ஆழி சூழ்ந்த பூவுலகில்
ஆதவனாய் நபி பிறந்தார்
பாலை மண்ணில் சோலை வனமாய்
பாரில் எங்கள் நபி பிறந்தார்
சோலை வனத்தில் நறு மலராக
சத்தியத் தூதர் நபி பிறந்தார்
இருளை நீக்கி ஒளிதனை வீச
உத்தமத் தூதர் நபி பிறந்தார்
அருளைப் பொழிந்து உலகம் செழிக்க
ஏந்தல் எங்கள் நபி பிறந்தார்
ஓற்றுமை ஓங்க வேற்றுமை நீங்க
இறைவன் தூதர் நபி பிறந்தார்
நன்மையை ஏவி தீமையை விலக்க
நானிலத்தில் நபி பிறந்தார்
உண்மையை உணர்த்த பொய்மையை ஒளிக்க
எழுதத் தெரியா(த) நபி பிறந்தார்
பெண்டிர் வாழ்வை கண்ணியமாக்க
பூமான் எங்கள் நபி பிறந்தார்
சிறுமைகள் ஒழிந்து பெருமைகள் ஒளிர
சீலர் எங்கள் நபி பிறந்தார்
மறுமையின் நாளை மனிதர்க் குணர்த்த
மக்க நகரில் நபி பிறந்தார்
பொறுமையின் பெருமையை உலகுக் குணர்த்த
போதர் எங்கள் நபி பிறந்தார்
கொடுமைகள் தீர மடைமைகள் ஓட
கோமான் எங்கள் நபி பிறந்தார்
கடைமைகள் ஐந்தும் உடைமைகள் என்றே
கண்ணிய எங்கள் நபி பிறந்தார்
அடிமை விலங்கை உடைத்திட என்றே
அண்ணல் எங்கள் நபி பிறந்தார்
- கலாநெஞ்சன் ஷாஜஹான்
No comments:
Post a Comment